أنا الصابر قرون و سنين
انا من صدق كل الكدابين
أنا مصري من المساكين.
أنا المولود فى طابور العيش
و أنا العايش فى توبي الخيش
و أنا الشهيد من جنود الجيش
أنا مصري من المساكين.
خيبتي ع قدي و مقاسي
أنا إللي قتلوا إحساسي
و أنا المعدودة أنفاسي
أنا مصري من المساكين.
أنا من صدق وعود تخاريف
كنت زمان فقير، بس عفيف
أنا طوق نجاتي ع شكل رغيف
أنا مصري من المساكين.
أنا المخدوع ف كل زمان
حزب وطني و سلفي و إخوان
تلاقيني شيوعي و قبطي كمان
أنا مصري من المساكين.
أنا المتألم و الصوت واطي
أنا دايماً أستحمل و أطاطي
الزيت و السكر شروا أصواتي
أنا مصري من المساكين.
و أنا إللي بخطف في عيالي
ولاد الشوارع مش دول عيالي؟
و قولوا لي مين زيي و مثالي ؟
أنا المصري من المساكين.
عاطف كامل.